Galvanisert spikar rustar ikkje. Men av og til er problemstillinga meir grunnleggande.
Ingen av desse bileta er manipulerte. Biletet til venstre er eit utsnitt av det til høgre. Objektivt sett er begge sanne. Isolert sett kan biletet til venstre vere skuleeksempel på uansvarleg framferd. Om ein derimot klikkar på biletet til høgre, har litt erfaring og i tillegg kjenner historia bak, burde igrunnen ikkje biletet få nokon til å heve eit augnebryn. Og slik let vi oss lure heile tida.
Han berre stod der, mellom meg og TV-skjermen. Eg oversåg han, bokstavleg tala. No er han her.
Og eg veit faktisk kva han heiter. Calandiva, eller dobbel eldtopp. Så no veit du det óg.
Er det slik at 2011 er oppbrukt og at vi no står klar til å tøme 2012 ? Eller kanskje har vi no korka 2011 og allereie er i gang med å fylle 2012 ? Eg vel det siste. Lukke til med arbeidet.
Eg var ein runde i skogen i dag, der det er mogleg å kome fram. Ser at eg ikkje vert arbeidslaus på mange år.
Denne posten er utan bilete. Biletet eg skulle legge ut vart rett og slett aldri teke. Dagen dette ikkje skjedde var søndag 16. oktober i halv sekstida.
Det var ein litt regntung ettermiddag og eg var på veg i bil til Fosnavåg. Inne i fjordane var det allereie halvskymt, men eg har ofte opplevd korleis det lysnar når eg nærmar meg kysten og himmelen faldar seg ut over meg. Difor tok eg med meg kameraet likevel.
Rett før du kjem til Fosnavåg kryssar vegen eit sund. Sidan har eg funne ut at brua over sundet må vere Buholmbrua og det var medan eg var ute på brua eg såg biletet mitt. På ein liten grøn holme på sørsida av vegen låg eit gamalt hus. Vind, sol, regn og lite vedlikehald hadde sett sine tydelege spor. Men det var lett å sjå at det ein gong hadde vore eit staseleg bygg. Den gongen for lenge sidan då det å bu på ein veglaus holme ikkje var nokon ulempe. Tuntrea var store kastanjar, kanskje bøk og eik óg ,det var ikkje så lett å sjå. Men haustfargane var uansett på sitt mest intense. Grønt, gult, orange, raudt og brunt . Og denne ettermiddagen var det som om alt der ute på denne holmen var lyssett innanfrå . Den verbitne bordkledningen på huset skein som sølv.
Men eg kunne ikkje stanse der ute på brua. Dessutan var det allereie for mørkt til å ta bilete. I alle høve utan stativ. Difor eksisterer dette biletet kun inne i hovudet mitt. Og det vert berre vakrare og vakrare. Lightroom og Photoshop og andre biletbehandlingsprogram har ikkje ein paddesjangs mot det som skjer med bilete som kun finst inne i hovudet vårt.
Dei er berre så vanskelege å dele.
I ettertid har eg leita litt rundt på nettet for å finne bilete frå Krøkja, som denne holmen truleg heiter. Dette er det einaste eg har funne.
Men bakom lurer terningen.
Eller noko anna.
Men du må synge alvorleg fort 4. søndag dersom du skal rekke alle fire versa før “lysa” er utbrende eller sloknar av seg sjølv.
Fysikarar ved det kjende CERN-laboratoriet utanfor Geneve meiner at dei har gjennomført forsøk der dei har fått partiklar til å gå raskare enn lyset. Einstein tok dermed feil og alle aksepterte naturlover gjeld difor ikkje i mikroverda.
Når ein kan gjere slike observasjonar som dei du ser på biletet, kan ein lure på om det same er tilfelle i makroverda.
Siste kommentarer